الامور على ما يرام في الحديقة ب و الحمد لله في الطريق الصحيح وقتلي يلزم ننقدو و نتكلمو و نضغطو ما نبخلوش ! و وقتللي لازم نشكرو الناس ما نحشموش ! بش نكونو موضوعيين و أمناء مع أنفسنا ما فماش مكشّخ مش فرحان الايامات إن الله يديم نعم الحامدين فالحمد لله
🟡 الغربلة أهمّ!
احسن ما في الصيف أننا نحينا الزايد من غير ما مشينا ل nutritionniste ! وراء هذا مدرب قال هاذوما ما يساعدونيش و هذا لي فرّحني شخصيا مش لي تعملو مبروك معاليك المدرب لي عندو أفكار هي وحدها تدافع عليه ما تخافش عليه!في مرحلة ثانية حافظنا على الركائز و هذا مهم جدا قلنا انو فريق عمناول فيه مميش توغاي مرياح(اهم لاعب في الترجي في رايي) تقا اهولو ساس رودريغو valables ….في مرحلة ثالثة لي عوضوهم خير منهم ولا ! الاجابة اي خير منهم و لا يختلف في هذا مكشّخان ! 🇧🇪😀
🔴الكورة عندك يا ميغال !
يتحسبلو انو مدرب حي يعيش ماتشواتو مع قراءة تكتيكية ممتازة للمقابلات
مدربنا و ستافو جاونا في جانفي و التران يمشي شفنا نقلة نوعية في الوقفة في الانضباط التكتيكي (ماتش سان داونز في تونس الأروع عندي سنين ما ريتش ترجي في مستوى عالي تكتيكيا كيف الدومي) شفنا انضباط ملاعبية حضور بدني خصوصا في ال التحولات الدفاعية … هجوميا وجه شاحب نلتمسو عذر للمدرب في كونو خانتنا القلة الفنية على مستوى الأظهرة و وسط الميدان و الأجنحة و لكن
اليوم أشرفت بنفسك على المركاتو على الغربلة على التحضيرات تم توفير الأسلحة الازمة بش نراو الترجي اي نعرفوها … نحبو كورة هجومية ممتعة الوصفة واضحة
Résultat و manière
Bref تصرف bro
🟡الهدف في الترجي عمرو ما كان نتائج
مغالطات من نوع هدفنا الخامسة هدفنا تشامبيونز هدفنا سوبر ليغ ! يتسمى ضغط سلبي في رايي … هدفنا الحقيقي هو تكوين فريق صلب ! حتى حد ما يحبش يهز القاب الكلنا و لكن الطلوع عالبوديوم هو نتيجة حتمية للفرص و ال possession و اللعب في نصف ميدان الخصم و الضغط و حب الانتصار … النتيجة توفيق من عند ربي … العب و اقمع المنافسين و افرض لعبك تاو تجي الالقاب
🟡اش مازال !
المركاتو مازال و باذن الله الطاولة ناقصها شكشوكة محرحرة من عند خالتي جنّات مع دوبلير للبلايلي يا ربّي و رضاك تبقى جيست شد يديك بطايزون حتى تلقى اريار دروا انا مع كامل احتراماتي فينال الاهلي 180 دقيقة بن علي بوشنيبة قسموهم لعب مقابلهم كريم فؤاد ظهير ايمن بالأساس يلعب عكس ساقو ربح معاهم الثنائيات و وزع و تعدى اكثر منهم سامحني فيهم الزوز
🟡عقد الإستشهار!
الجمعية لي نجاحاتها الرياضية سابقتها ، التحدّيات لي يستناو فينا .. بالماراسنا و تاريخنا لي ورانا … جمهورنا الكبير عمق شعبي يتمناه كل مستشهر …. الجمعية لي تعمل اكثر من 40 نقطة بيع للملابس رغم ضعف ااتوزيع يعني حتى في الحوايج عنا مشاكل في للتوزيع يا بوڤلب 😂ربراند كيما الترجي حلمة تسيل لعاب الشركات العالمية! ال engouement متع جمهورنا عنا عشرة ايام بعنا تقريبا 7000 اشتراك ما فماش علاش ما يدخلش للترجي 15 مليار عالاقل بعنوان عقد استشهار … أضعف الإيمان اذا تحب تخلي الدليس في كاس العالم و هذا لي بش يصير حط 20 مليون دينار sponsor بش ما يصدعولناش ريوسنا المتملقين و المتسلقين بلغة كان مش سي حمدي راو جامع سيدي محرز ما تبناش !(صحة و فرحة المرابيح قرينا الخبر و فرحنا الايامات ان شاء الله ربي يباركلك و يزيدك فضل الترجي و جمهورو كبير في هذا )
اما بجاه رب العباد هاذيكة ثلاثة مليارات استشهار و البقية 18 مساهمات رئيس النادي لا تعاودوها امان رانا فقنا بيها سامحونا …شوفو formule اخرى… يا ليت مستشهر ضخم عالمريول يباركلكم!
🔴الكورة عنا !
توة انتي كمكشخ الكورة عندك وصلنا سبعة الاف و باذن الله الويكاند هذا الالف الثامن دزو مبوتو … ما فمة حتى عذر يخليك ما تعملش ابونمون ما فمة حتى عذر يخليك تهبط تشد الصف عالتساكر ما تكونش سبب في الفوضى ما تخليش روحك تتمرمد في وسط العام راو اشتراك ب 200 د قد زوز تساكر مارشي نوار تحطهم في جيوب كلاب النار .. ما فمة حتى عذر يفسر اننا ما نوصلوش ل 25 الف ابونمون السنا ! يبقاو التساكر حاجة قليلة تسهال مهمة تأمين المقابلات و نحميو جمعيتنا من المخربين و من الخطايا … تي حتى الداخلية يساعدها و تولي تسيبلك اكثر طاقة استيعاب ! و فوق هذا و دونو تتنعوش كاسة الترجي بفلوس جمهورها لي هو الداعم الأول ليها حتى حمدي المدب بيدو واحد من جمهورها
الترجي بفضل ربي في الطريق الصحيح المدرب توفرتلو المتطلبات الكل يا ربي يجي شكشوكة هو وحدو لي بش يعمل النقلة النوعية في لعبنا … عمناول وسط ميداننا لا شاط لا مرر لا سجل ….بش نلعبو اقل شي 40 مقابلة مع فرق اضعف منا بجاه ربي ثلاثة بيفوات لا عندك ساس تحت المهاجم و خط تحتو الزوز لي تحب
تعليقات
إرسال تعليق