اخر اخبار ميركاتو الترجي الرياضي التونسي

لحد اللحظة مركاتو مقبول مع شح السوق المحلي و قانون الاجانب 

كانت اكبر مشاكل الفريق هي نقص الجودة في الاطراف خاصة ،الفريق ما كانش فيه جناح يقدر علي الابتكار و ايجاد الحلول ضد تكتلات الخصم ،و الفريق كان يعاني من نقص كبير علي مستوي الاظهرة 

حاليا انتداب البلايلي و موكوينا حلول جيدة في الاطراف ،الكل تعرف جودة البلايلي التقنية و قدرته علي جعل وضعية فيه تفوق عددي للخصم تولي فيه تفوق عددي لترجي بفضل امكانياته في المرواغة، موكوينا نفس الشي ارقامه تقول اللي هو احسن مرواغ في دوري جنوب افريقيا 

بن محمد حد ما يشك في امكانيات بن محمد التكتيكية و البدنية لاعب يقدر علي لعب اكثر من دور داخل الملعب هو حل جيد للجهة اليسرى و الشي الإيجابي البلايلي و بن محمد لعبين مع بعضهم اكثر من زوز مواسم ،يعني بن محمد يعرف شرب البلايلي بلغتنا احنا 

تبقي الجهة اليمنى و مازلت عند الراى متاعي هو أعطى الفرصة كاملة ب بوشنيبة 

اقناع رودريغاز هو اهم انتداب ينجم يحصل ،رودري مع بلايلي و موكوينا متاكد بش تتخلق ليه اكثر فرص و ماعاش بش يولي يهبط كثير للأسفل الا في حالات معينة في حال تخلقت المساحة

بقاء توغاي و مرياح مع انتداب الجلاصي تنجم تخليك تفكر و تصنع اكثر من طريقة لعب بين خط دفاع رياعي و حتي ثلاثي 

نجي لخط الوسط اللي هو اهم خط في الفريق و كيف ما يقول خوانما ليو اعطيني نوعية لاعبي خط الوسط متاع فريقك نعطيك نوعية كرة القدم اللي تقدم فيه 

مازلنا نحتاج الي لاعب في الوسط اللي يكركر الكرة ،لاعب من نوعية بن رمضان لاعب يتحرك في انصاف المساحات و يعرف يهبط يساهم في بناء الهجمة و يعرف يوصل لمنطقة الخصم يكمل الهجمة 

خط الوسط متاعنا فيه الامكانيات البدنية من نوعية روجي و تقا و اوغبيلو و انتداب العزوني نفس الشي ماعندكش حلول محلية كثيرة حسب اعتقادي انتداب مقبول 

العايب و الدربالي لو يتم توظيفهم بالطريقة الصحيحة حسب البروفيل متاعهم أكيد قادرين علي تقديم الاضافة 

الحاجة الباهية في القائمة اللي مشات لطبرقة هو وجود لاعبين شبان اولاد النادي خاصة معشى و كادا حاصة قصى معشى يلزم ياخذ برشا وقت لعب 

حسب الاخبار مازل الفريق يسعى نحو تدعيم الفريق بصفقة أو صفقتين اخرين 

الكرة حاليا عند البرتغالي ،هو تاو المسؤول علي اختيار الانتدابات و الغربلة اللي هذي من المرات القليلة اللي تصير اخر فترة في الترجي غربلة بالعدد هذا 

كاردوزو مطلوب منه خلق نظام لعب مناسب للادوات هجوميا و دفاعيا ،كاردوزو الموسم هذا لا يملك اعذار متاع اخر الموسم الماضي بحكم جاء في فترة قصيرة و صعبة ،اليوم بالادوات المتاحة عنده مطالب انه يستغل الجودة متاعهم و يقدم كرة قدم محترمة و في حجم الترجي